Appeal to Chief Justice of Pakistan,

---

افتخار محمد چوہدری صاحب
محترم چیف جسٹس آف پاکستان
اپیل برائے انصاف

جنابِ عالی،
ہم بیرون ملک مقیم وُہ پاکستانی ہیں جو وطن اور اپنوں سے دُور دیارِ غیر میں رہ کے اپنے وطن کے لئے زرِ مبادلہ کماتے ہیں۔لیکن افسوس کہ کئی کئی سالوں کی محنتِ شاقہ سے کمائی گئی دولت اپنے وطن میں ہی بیٹھے ہوئے لوگ لوُٹ لیتے ہیں۔
جنابِ عالی میں وکیل تو نہیں ہوں اِسلئے قانونی زبان لِکھنے کا ماہر نہیں لیکن سادہ الفاظ میں اپنا مقدمہ آپ جناب کی خدمت میں پیش کرنے کی کوشش کر رہاہوں۔ اسلئے زبان کی کوتاہی کی پیشگی معذرت چاہوں گا
میں ڈی ایچ اے لاہور کے متاثرین میں سے ہوں۔ کئی سال ہو گئے ہیں کہ لاہور ائرپورٹ کے سامنے ایک رہائشی اسکیم ”پارک ویو ہاؤسنگ سوسائٹی” کے نام سے مشتہر ہوئی۔ بہت سے پاکستانیوں نے اپنی جمع پونجی دے کہ وہاں پلاٹوں کی فائلز خریدیں۔ اسکیم کے بہترین محلِ وقوع کی وجہ سے ڈی ایچ اے لاہور نے اُس وقت کی پارک ویو انتظامیہ سے معاہدہ کر کے مذکورہ اسکیم کو ڈی ایچ اے فیز8 میں شامل کر لیا۔ انگریزی اخبار دی نیشن میں 13 مئی 2008 کو پارک ویو اسکیم کے ڈی ایچ اے لاہور کے ساتھ انضمام کی خبر شائع ہوئی۔ اب ہونا تو یہ چاہیے تھا کہ ڈی ایچ اے اپنی ایمانداری سے وہاں پہ قرعہ اندازی کروا کے پلاٹ فائل ہولڈرز کو دیتا، لیکن کئی سال سے اوپر کا عرصہ گذر چُکا ہے لیکن اسکیم کے اصل حقداروں کی کوئی شنوائی نہیں ہو سکی۔ بلکہ اُسی جگہ پہ ڈی ایچ اے نے کُچھ اور پراجیکٹ بنا کے بیچ دیے ہیں۔ سال 2010 میں ڈی ایچ اے نے اپنے فیز 8 کی بابت قرعہ اندازی بھی کی لیکن پارک ویو فائلز ہولڈرز کو یکسر نظر انداز کر دیا گیا۔
آج کل پارک ویو کی پُرانی انتظامیہ ایک اور پراجیکٹ ”پارک ویو وِلاز، ملتان روڈ، لاہور” کے نام سے اشتہار شائع کروا رہی ہے جِس میں واضح طور پہ لکھا ہوا ہے کہ پارک ویو بالمقابل لاہور ائرپورٹ کی شاندار کامیابی کے بعد۔ کیا یہی کامیابی کا معیار ہی کہ لوگوں سے پیسہ وُصول کر کے انہیں کِسی اور کے حوالے کر دِیا جائے جو لوگوں کی بات سُننے تک کے روادار نہ ہوں
جب بھی کوئی فائل ہولڈر ڈی ایچ اے لاہور کے دفتر فون کرکے پارک ویو فائلوں کی قرعہ اندازی کی بابت دریافت کرے تو کہا جاتا ہے کہ ابھی کوئی منصوبہ زیرِ غور نہیں کہ ان فائلوں کی قرعہ اندازی کی جائے۔ آپ بیشک تحقیقات کروا لیجئے۔ شاید ڈی ایچ اے والوں کو یہ یقین ہے کہ پاکستان میں کوئی اُن کو نہیں پوچھ سکتا اسلئے وُہ کب کِسی کو کیا دیں یہ اُنکی اپنی صوابدید ہے۔
اِسی سلسلے میں ایک متاثرہ فائل ہولڈر مِسز حمیرہ نجمی نے لاہور ہائیکوٹ میں ایک مقدمہ دائر کیا۔ مذکورہ مقدمہ نمبر 6161-10 جناب جسٹس شیخ عظمت سعید صاحب کی عدالت میں مہینوں سے التوا کا شکار ہے۔ تاریخ پہ تاریخ ڈال دی جاتی ہے۔آج مؤرخہ 13 اپریل 2011 تک مندرجہ بالا مقدمہ کِسی کاز لِسٹ میں بھی موجود نہیں ہے۔
محترم چیف جسٹس صاحب، ہم آپ سے اپیل کرتے ہیں کہ براہِ کرم ہماری داد رسی کی جائے۔ یہ معاملہ چند لاکھ رُوپوں کا نہیں بلکہ اربوں روپوں کی مالیت کا ہے کیونکہ ایک ایک فائل کے قیمت ملین رُوپوں سے بھی زیادہ ہے اور ابھی تک کئی سو فائلیں ہیں جنکی آج تک کوئی قرعہ اندازی یا الاٹمنٹ نہیں ہو سکی۔
مزید برآں ہم آپ سے بھی یہ بھی اپیل کرتے ہیں کہ خُدارا ایک ایسا ادارہ بنانے کا حُکم جاری کیا جائے جو ہر مشتہر ہونے والی اسکیم کی قانونی پڑتال کرے اور اِس بات کو یقینی بنائے کہ ہر اسکیم والے کے پاس پہلے سے زمین موجود ہو، متعلقہ اداروں سے تمامتر منظوری لی جاچکی ہو۔ تاکہ پیسہ ادا کرنے کے بعد لوگوں کو اُن کا حق فوری طور پہ مِل سکے۔ بدقسمتی سے اسوقت ڈی ایچ اے، بحریہ ٹاؤن، ایڈن گروپ اور کئی دُوسرے ادارے ایسے ہیں جنہوں نے لوگوں کے اربوں کھربوں رُوپے وصول کر لئے ہوئے ہیں لیکن عرصہ دراز گذرنے کے باوجود لوگوں کو پلاٹ نہیں مہیا کئے گئے۔ میں حلفاً کہہ سکتا ہوں کہ اگر سُپریم کورٹ اخبارات میں ایک اشتہار جاری کرے کہ تمام لوگ جو ایسی لینڈ مافیا گردی کا شکار ہیں سُپریم کورٹ کے کِسی پتے پہ اپنی شکایات بھیجیں تاکہ اُنکی فوری داد رسی کی جا سکے تو وُصول ہونے والی درخواستوں کی تعداد سے معاملے کی ہوشربا سنگینی کا اندازہ آسانی سے لگایا جا سکے گا۔ شاید یہ پاکستان کی تاریخ کا سب سے بڑا اسکینڈل ہو۔

جنابِ عالی، ہم اسوقت انصاف کے لئے صرف آپ پہ اعتبار کر سکتے ہیں۔

انصاف کا طالب

ملک عبداللہ
و دیگر متاثرین

Only those who are the victims in the ex-parkview society (current Phase 8) are welcomed to comment. Please give your suggestions to modify the contents of this appeal. Unfortunately due to my personal business, I could not pay attention to it. Although these days I have found some rumors about the upcoming ballot but I don't want that we are cheated again and our files are not included in the balloting in May (if any). So I have to send the appeal to CJP. I know the route and Insha Allah our appeal shall reach to CJP.

For any comments, suggestion, you can write an email to

Due to certain reasons I will not be able to give/disclose my contact details. But the email address is there for your comments/suggestions.